Léite Pléite is teideal do chlár nua litríochta atá á chur i láthair ag Mícheál Ó hUanacháin gach Satharn ag 8.30 i.n. ar RTÉ Raidió na Gaeltachta mar chuid de sceideal nua an fhómhair.

Scoth na nuascríbhneoireachta Ghaeilge a bheidh faoi chaibidil ar an ngné-chlár seo ina mbeidh tuairimí, léirmheasanna, agallaimh, dréachta nuafhilíochta agus nuaphróis le cloisteáil. Coinneofar súil ar imeachtaí na bhfoilsitheoirí, leis, gan trácht ar na heagarthóirí irise. Beidh suim ar leith ag an gclár i saothair na scríbhneoirí nua atá ag teacht chun cinn. Tá sé i gceist go mbeidh sain-eagráin den chlár ann tráth imeachtaí móra liteartha, mar shampla fógairt bhuaiteoirí chomórtais liteartha an Oireachtais.

File, critic agus iar-Eagarthóir ar phríomh-iris liteartha na Gaeilge, Comhar, is ea Mícheál Ó hUanacháin. Tá trí chnuasach nua filíochta leis foilsithe ó chasadh na Mílaoise i leith: Tráchtaireacht ar na Cluichí Móra (An Clóchomhar, 2000), dánta.com (Coiscéim, 2005) agus Damhsa Rúnda (Coiscéim, 2008). Iriseoir nuachta agus cúrsaí reatha le RTÉ le fada é, áit a raibh sé ina thuairisceoir agus ina láithreoir don chlár iomráiteach Féach tamall, agus mar a bhfuil sé anois ag plé le tuairisceoireacht nuachta don láthair idirlín, RTÉ.ie.

Thosaigh Léite Pléite cúpla seachtain ó shin agus beidh sé le cloisteáil ar RTÉ Raidió na Gaeltachta gach Satharn ag 8.00 i.n as seo amach.

Comments (0) »

Show/Hide comment form

Name

Email

Title

Comment

Write the displayed characters

Add Comment